Ugrás a tartalomhoz

Régi magyar irodalmi szöveggyűjtemény I.

Ács Pál (1954–), Jankovics József (1949–), Kőszeghy Péter (1951–)

Balassi Kiadó

AD IOANNEM PANNONIUM POETAM ELEGIDION

AD IOANNEM PANNONIUM POETAM ELEGIDION


      Orba parens nato, primos experta labores
          Lucinae, quantis fletibus aegra gemit,
      Impatiensque gravis moeroris busta frequentat,
          Et multis cippum moesta rigat lacrymis.
5   Poenitet ingratam ulterius producere vitam,
          Deserta solam nec iuvat esse domo
      Moerentes tantis nos intabescimus, eheu!
          Fletibus, ecquis se temperet a lacrymis?
      Tu decus et populi flos delibatus, et ingens
10       Gloria, tu patriae splendor erasque tuae.
      Per te Pannonios invisere coepit Apollo,
          Per te Pannoniis collibus ire iuvat.
      Macte animi, primus qui barbara verba fugasti,
          Pannoniosque facis cum Cicerone loqui.
15   Tu primus Latio docuisti posse lepore,
          Et canere Argolica carmina culta chely.
      Sparsisti angustum tu denique nomen in orbem,
          Per te immortalis patria facta tua est.
      Gradivo fuerat nuper quae sacra cruento,
20       Te duce nunc Phoebo clara trophaea refert.
      Scilicet ingenio praestat quam vincere Marte,
          Ornantur Musis praelia dulcisonis.
      Iure tibi acceptum, si quicquam possumus, ultro
          Reddimus, ac nobis, tu quoque numen eris.
25   Et velut Andiades sese debere fatentur,
          Virgilio, nostrae sic tibi Pannonides.
      Nec metuunt vinci, quanquam certare disertae
          Plurimae in Arctois gentibus esse solent,
      Impia si possent fatorum iura resolvi,
30       Et possent flecti numina laeva simul,
      Tu Pylios superare dies, tria saecula solus
          Nestoris illius vincere debueras,
      Et quod cornici, cervisque fugacibus aevum
          Contigit, id vates vivere dignus eras,
35   Sed quoniam Lachesis non lenia verba precantum
          Audit, nec precibus flectitur ipsa piis,
      Accipe Pympliadum tibi quae pia cura sororum
          Asserit, aeterno carmina rapta rogo.
      Carmina Letheum non formidantia flumen,
40       Carmina, nulla unquam deperitura die.