Ugrás a tartalomhoz

Régi magyar irodalmi szöveggyűjtemény I.

Ács Pál (1954–), Jankovics József (1949–), Kőszeghy Péter (1951–)

Balassi Kiadó

DE NAVIGATIONE

DE NAVIGATIONE

illustris et magnanimi equitis aurati Humfredi Gilberti ad deducendam in novum orbem coloniam suscepta, CARMEN EPIBATIKON

AD EUNDEM ILLUSTREM EQUITEM AUTORIS PRAEFATIO

Reddenda est, quam fieri potest brevissime, in hoc vestibulo ratio facti mei et cur ita homo novus et exterus, in tanta literatissimorum hominum copia quibus Anglia beata est, versandum in hoc argumento mihi putaverim: ita enim tu, fortissime Gilberte, foetum hunc nostrum in lucem exire voluisti.

In servitute et barbarie Turcica, Christianis tamen magno immortalis Dei beneficio parentibus, natus, aliquam etiam aetatis partem educatus, postquam doctissimorum hominum opera, quibus tum Pannoniae nostrae tum imprimis salvae adhuc earum reliquiae florescunt, in literis adolevissem, more nostrorum hominum ad invisendas Christiani orbis Academias ablegatus fui. Qua in peregrinatione, non solum compluria Musarum hospitia sed multas etiam sapienter institutas respublicas, multarum ecclesiarum probatissimas administrationes introspeximus, iam ferme triennio ea in re posito. Fuerat haec nostra profectio ita a nobis comparata ut non tantum mores et urbes gentium videndum sed in familiaritatem, aut saltem notitiam, illustriorum hominum introeundum nobis putaremus.

Caeterum, ut hoc a nobis sine invidia dici possit (certe enim taceri absque malicia nullo modo potest), non locus, non natio, non respublica ulla nobis aeque ac tua Britannia complacuit, quamcunque in partem eventum consilii mei considerem. Accedit quod praeter omnem expectationem meam, ab omnibus tuis civibus quibuscum aliqua consuetudo mihi contigit, tanta passim humanitate acceptus essem ut iam (sit hoc salva pietate a me dictum) suavissimae Anglorum amicitiae ferme aboleverint desiderium et Pannoniarum et Budae meae, quibus patriae nomen debeo.

Quas ob caussas, cum saepenumero animus fuisset significationem aliquam nostrae huius voluntatis et existimationis edendi, accidit utique secundum sententiam ut, dum salutandis et cognoscendis excellentibus viris Londini operam do, ornatissimus ac doctissimus amicus meus Richardus Hacletius ad te me deduxerit, explicato mihi praeclarissimo tuo de ducenda propediem colonia in novum orbem instituto. Quae dum aguntur, agnoscere potui ego illud corpus et animum tuum sempiterna posteritatis commemoratione dignum; et agnovi profecto, eaque tali ac tanta observantia prosequi caepi ut, cum paullo post plura de tuis virtutibus et rebus gestis passim audissem, tempus longe accommodatissimum existimarem esse quo aliqua parte officii studiique nostri, erga te et tuam gentem, perfungerer. Hoc est primum ovum unde epibatikon originem ducit. Reliquum est ut eas et redeas quam prosperrime, vir nobilissime, et benevolentia tua, autoritate ac nomine, tueare studium nostrum.

Vale.

AD THAMESIN


     Amnis, inoffensa qui tam requiete beatus
         Antipodum quaeris iam tibi in orbe locum,
     Nunc tibi principium meritae, pro tempore, laudis
         Fecimus, et raucae carmina prima tubae.
5   Tum, cum reddideris modo quam dimittimus Argo,
         Ornatu perages gaudia festa novo.

DE NAVIGATIONE


       Quae nova tam subito mutati gratia coeli?
       Unde graves nimbi vitreas tenuantur in auras,
       Diffugiunt nebulae, puroque nitentior ortu
       Illustrat terras clementiaque aequora Titan?
 5    Nimirum posuere Noti, meliorque resurgit
       Eurus, et in ventos solvuntur vela secundos,
       Vela quibus gentis decus immortale Britannae
       Tendit ad ignotum nostris maioribus orbem
       Vix notis Gilbertus aquis. Ecquando licebit
10   Ordiri heroas laudes et facta nepotum
       Attonitis memoranda animis, si caepta silendum est
       Illa quibus nostri priscis aetatibus audent
       Conferri et certare dies? Quibus obvia plano
       Iamdudum Fortuna solo, quibus omne per undas
15   Nereidum genus exultat, faustoque tridenti
       Ipse pater Nereus placabile temperat aequor.
       Et passim Oceano curvi delphines ab imo
       In summos saliunt fluctus, quasi terga pararent
       In quibus evectae sulcent freta prospera puppes.
20   Et, quasi diluvium tempestatesque, minatur
       Follibus inflatis inimica in vela physeter.
       Et favet Aegaeon, et qui Neptunia Proteus
       Armenta ac turpes alit imo in gurgite phocas.
       Atque idem modo ab antiqua virtute celebrat
25   Sceptra Chaledonidum, seclis modo fata futuris
       Pandit et ad seros canit eventura minores.
           Ut pacis bellique bonis notissima vasto
       Insula in Oceano, magni decus Anglia mundi,
       Postquam opibus dives, populo numerosa frequenti,
30   Tot celebris factis toto caput extulit orbe?
       Non incauta sui, ne quando immensa potestas
       Pondere sit ruitura suo, nova moenia natis
       Quaerat, et in longum extendat sua regna recessum:
       Non aliter quam, cum ventis sublimibus aptae
35   In nidis crevere grues, proficiscitur ingens
       De nostra ad tepidum tellure colonia Nilum.
           Euge, sacrum pectus: tibi per tot secula soli
       Servata est regio nullis regnata Monarchis.
       Et triplici quondam mundi natura notata
40   Margine, et audacem quarto dignata Columbum,
       Iam quinta lustranda plaga tibi, iamque regenda
       Imperio superest. Europam Asiamque relinque,
       Et fortunatam (nimium nisi sole propinquo
       Arderet) Libyen. Illis sua facta viasque
45   Terminet Alcides: abs te illustranda quiescit
       Parte alia tellus, quam non Babylonia sceptra,
       Non Macedum invictae vires, non Persica virtus
       Attigit aut unquam Latiae feriere secures.
       Non illo soboles Mahometi mugiit orbe:
50   Non vafer Hispanus, coelo superisque relictis,
       Sacra Papae humano crudelia sanguine fecit.
       Illic mortales hominumque ignota propago:
       Sive illi nostrae veniant ab origine gentis,
       Seu tandem a prisca Faunorum stirpe supersint
55   Antiqua geniti terra, sine legibus urbes
       Sylvasque et pingues habitant civilibus agros
       Et priscos referunt mores, vitamque sequuntur
       Italiae antiquae et primi rude temporis aevum
       Cum genitor nati fugiens Saturnus ob iram
60   In Latio posuit sedem, rudibusque regendos
       In tenues vicos homines collegit ab agris.
       Aurea in hoc primum populo caepisse feruntur
       Secula, sicque homines vitam duxisse beati:
       Ut, simul argenti percurrens tempora et aeris
65   Degener in durum chalybem vilesceret aetas,
       Rursus in antiquum, de quo descenderat, aurum
       (Sic perhibent vates) aevo vertente rediret.
           Fallor an est tempus, revolutoque orbe videntur
       Aurea pacificae transmittere secula gentes?
70   Fallor enim, si quassatas tot cladibus urbes
       Respicio et passim lacerantes regna tyrannos:
       Si Mahometigenis Asiam Libyamque cruento
       Marte premi, domitaque iugum cervice subire.
       Iamque per Europae fines immane tribunal
75   Barbari adorari domini, Dacisque Pelasgisque
       Aemathiisque omnique solo quod dividit Hebrus:
       Et, quondam bello invictis, nunc Marte sinistro
       Angustos fines parvamque tuentibus oram,
       Pannoniae populis et prisca in gente Liburnis.
80   Tum vero in superos pugnas sine fine cieri
       Patribus Ausoniis: ardere in bella necesque
       Sarmaticas gentes, et adhuc a caede recenti
       Hispanum sancto Gallumque madere cruore.
       Non sunt haec auri non sunt documenta, sed atrox
85   Ingenio referunt ferrum et, si dicere ferro
       Deteriora mihi licet, intractabile saxum.
           At vero ad niveos alia si parte Britannos
       Verto oculos animumque, quot, o pulcherrima tellus,
       Testibus antiquo vitam traducis in auro!
90   Namque quod hoc summum colitur tibi numen honore
       Quo superi, atque omnis geniorum casta iuventus
       Illius ad sacra iussa vices obit, arguit aurum.
       Quod tam chara Deo tua sceptra gubernat Amazon
       Quam Dea, cum nondum coelis Astraea petitis
95   Inter mortales regina erat, arguit aurum.
       Quod colit haud ullis inclusas moenibus urbes
       Aurea libertas, et nescia ferre tyrannum
       Securam aetatem tellus agit, arguit aurum.
       Quod regio, nullis iniuria gentibus, arma
100   Arma licet ferruginea rubicunda quiete
         Finitimis metuenda gerit tamen, arguit aurum.
         Quod gladii, quod mucrones, quod pila, quod hastae
         In rastros abiere, et bello assueta iuventus
         Pacem et amicitias dulces colit, arguit aurum.
105       Denique, si fas est auro connectere laudes
         Aeris et in pacis venerari tempore fortes,
         Quot natos bello heroas, quot ahenea nutris
         Pectora! Sint testes procerum tot millia, testes
         Mille duces, interque duces notissima mille
110   Illa cui assurgunt Musae, quam conscia Pallas
         Laetior exaudit, – Gileberti gloria nostri.
         Illius auxilium et socialia praelia amici
         Mirantur Belgae, et quamvis iniustus Iberus
         Commemorat iustas acies, domitasque per oras
115   Martia victrices formidat Hibernia turmas.
         Illum oppugnatae quassatis turribus arces,
         Illum expugnatae perruptis moenibus urbes,
         Fluminaque et portus capti, hostilique notatum
         Sanguine submersae meminere sub aequore classes, –
120   Hic ubi per medios proiectus Sequana Celtas
         Labitur, et nomen mox amissurus et undas.
         Omnia si desint, quantum est, ingentibus ausis
         Humani generis pro pace bonoque, pacisci
         Tam varios casus, freta tanta, pericula tanta?
125   Linquere adhuc teneram prolem et dulcissima sacri
         Oscula coniugii, numerantemque ordine longo
         Aucheriam digitis in mollibus aequora mille
         Formidanda modis: atque inter pauca relatos
         Aucherios exempla suos, fratremque patremque
130   Qui dum pro patria laudem et virtute sequuntur,
         Obsessi in muris soli portisque Caleti
         Praeposuere mori quam, cum prodentibus urbem
         Et decus Albionum, turpi superesse salute.
             Quodsi parva loquor, nec adhuc fortasse fatenda est
135   Aurea in hoc iterum gens vivere mundo,
         Quid vetat ignotis ut possit surgere terris?
         Auguror (et faveat dictis Deus) auguror annos
         In quibus haud illo secus olim principe in urbes
         Barbara plebs coeat quam cum nova saxa vocaret
140   Amphion Thebas, Troiana ad moenia Phoebus:
         Atque ubi sic ultro iunctas sociaverit aedes,
         Deinde dabit leges custoditurus easdem.
         In quibus, ignari cives fraudumque dolique,
         A solida assuescant potius virtute beari
145   Quam genio et molli liquentia corpora vita
         In Venerem ignavam pinguemque immergere luxum:
         Quam nummos, quam lucra sequi, quam propter honores
         Vivere ad arbitrium stolidae mutabile plebis.
         Non illic generi virtus opibusve premetur
150   Libertas populi, non contra in deside vulgo
         Oppugnabit opes, civis sub nomine, pauper:
         Quisque suo partem foelix in iure capesset.
         Tum sua magna parens ingenti foenore tellus
         Exiguo sudore dabit bona: cura iuventam
155   Nulla adiget senio, nec sic labor ocia tollet
         Quominus e virtute petant sua commoda cives.
             O mihi foelicem si fas conscendere puppim
         Et tecum, patria (pietas ignosce) relicta,
         Longinquum penetrare fretum, penetrare sorores
160   Mecum una Aonias, illic exordia gentis
         Prima novae ad seros transmittere posse nepotes!
         Sed me fata vetant, memoraturumque canora
         Inclyta facta tuba ad clades miserabilis Istri
         Invitum retrahunt: his, his me fata reservent.
165   Non deerit vates, illo qui cantet in orbe
         Aut veteres populos aut nostro incognita coelo
         Munera naturae, dum spreto Helicone manebit
         Illa Aganippaeis sacrata Oxonia Musis.
             Dum loquor in viridi festinant gramine Nymphae,
170   Impediuntque comas lauro et florentis olivae
         Frondibus armantur, dominatricemque frequentes
         Oceani immensi longe venerantur Elisam.
         Illa autem ad gelidum celsis de turribus amnem
         Prospicit, et iamiam Tamesino in patre tuetur
175   Paulatim obliquis Gilebertum albescere velis.
         Sic dea Peliaco spectasse e vertice Pallas
         Fertur Iasonios comites, ad Phasidos undas
         Vix bene dum notis committere carbasa ventis.
         Diva fave, nutuque tuo suscepta parari
180   Vela iuva: si sola geris dignissima totum
         Talibus auspiciis proferri sceptra per orbem.
             Propterea quia sola tuos ita pace beasti
         Tranquilla populos, ut iam te principe possint
         Augere imperii fines: quia sola videris
185   Quo nivea Charites, quo corpore Delia virgo
         Pingitur, et (iusto si sit pro teste vetustas)
         Talibus audimus quondam de matribus ortos
         Semideos homines. Tali est de sanguine magnus
         Sive Hector genitus, sive Hectore maior Achilles.
190   Duntaxat sine fraude ulla, sine crimine, possint
         Ulla tibi veterum conferri nomina matrum,
         Quae sexum factis superas, quae patribus audes,
         Nympha, diis dignas laudes aequare Latinis.
             Mentior infoelix, nisi sic in corpore virtus
195   Lucet formoso ceu, quae preciosior auro est,
         Gemma tamen pariter placituro clauditur auro.
         Mentior et taceo, nisi sola audiris ubique
         Induperatorum timor aut amor, inter et omnes
         Securam requiem peragis tutissima casus:
200   Dum reliqui reges, duro quasi carcere clausi,
         Sollicitis lethi dapibus plenoque fruuntur
         Terrificis monstris furtiva per ocia somno.
         Mentior et taceo, solam nisi vivere cives
         Aeternum cupiunt: quando nec verbere torvo
205   Nec caedis poenaeve thronum formidine firmas.
         Sed tibi tot meritis maiestas parta, et inermis
         Ad patulos residet custos clementia postes:
         Ut, quot pene rei iustum meruere tribunal,
         Tot veniam grato narrent sermone clientes.
210   Nec tamen admittis nisi quod iustumque piumque
         Agnoscit probitas, et, quae potes omnia, solis
         Legibus usurpas cautas sanctissima vires.
         Nec mala formidas: siquidem quasi fune ligatur
         Consilio fortuna tibi. Nullum impia terret
215   In castris Bellona tuis: quin pronus adorat
         Gradivus tua iussa pater, sequiturque vocantem
         Quacunque ingrederis grato victoria plausu.
         Dumque fores aliis vitamque et regna tuetur
         Ianitor externus, cingunt tua limina cives.
220       Dumque aliis sordet sapientia regibus, almo
         Pegasidum tu fonte satur tot Apollinis artes
         Aurea vaticina fundis quasi flumina lingua.
         Nil nostri invenere dies, nil prisca vetustas
         Prodidit, in linguis peragunt commercia nullis
225   Christiadum gentes, quas te, divina virago,
         Iustius Aoniae possint iactare sorores.
         Audiit haec mundus, cunctisque in finibus ardet
         Imperio parere tuo: et quae forte recusat
         Miratur vires regio tamen. Hinc tua sceptra
230   Incurva Mahometigenae cervice salutant:
         Hinc tua pugnaces properant ad foedera Galli,
         Dumque sibi metuit toties tibi victus Iberus,
         Nescia Romano Germania Marte domari
         Quaerit amicitias Britonum: procul oscula mittit
235   Virgineis pedibus Latium, longeque remoti
         Pannones in tutos optant coalescere fines.
             Magnanimi iuvenes, et qui Gilebertia cunque
         Signa comes sequeris consors vitaeque necisque,
         Quando quidem audimur votisque vocata virago
240   Annuit, eia age, rumpe moras, quantumque per auras
         Accelerare datur, properantibus utere velis!
         Nonne vides, quae submisso diademate nuper
         Obtulit invictis fascesque fidemque Britannis,
         Nonne vides passis ut crinibus horrida dudum
245   Porrigit ingentem lugubris America dextram?
             Et, „Numquid lacrymas”, inquit, „soror Anglia nostras
         Respicis et dura nobiscum in sorte gemiscis?
         An vero nescisse potes quae tempora quantis
         Cladibus egerimus, postquam insatiabilis auri
250   (Nam certe non ullus amor virtutis) Iberos
         In nostrum migrare solum (pietasve) coegit?
         Ex illo, quae sacra prius vaesana litabam
         Discere posse Deum, iubeor mortalibus aras
255   Erigere; et, mutas statuas truncosque precata,
         Nescio quod demens Romanum numen adoro.
         Cur trahor in terras? Si mens est lucida, puris
         Cur Deus in coelis recta non quaeritur: aut, si
         A nobis coelum petitur, cur saepe videmus
260   Igne, fame, ferro subigi quocunque reatu
         Oenotriae sedis maiestas laesa labascit?
         Non sic relligio, non sic (me iudice) gaudet
         Defendi sua regna Deus: quodsi optimus ille est,
         Quodsi cuncta potest et nullis indiget armis.
265   Mitto queri caedes exhaustaque moenia bello:
         Mitto queri in viles tot libera corpora servos
         Abiecta, immanique iugum Busiride dignum.
             Te tantum fortuna animet tua, te tua virtus:
         Si tibi tam plenis habitantur moenibus urbes
270   Ut, nisi in excelsum crescant coeloque minentur
         Aedes aeriae, quanquam latissima, desit
         Terra tamen populo: si tot tua flumina nigrant
         Turrigeras arces imitatae mole carinae,
         Quot non illa natant eadem tua flumina cygni:
275   Si tibi iam sub sole iacens penetratus utroque est
         Mundus, utroque iacens paragrata est terra sub axe.
             Ni frustra gelidum vectus Wilobeius ad arcton
         Illa in gente iacet cui, dum sol circinat umbras,
         Dimidio totus vix forsitan occidit anno.
280   Ni frustra, sub perpetuis aquilonibus ausi
         Burrhoidae fratres Scythicum sulcare profundum,
         Invenere solum et vasto nova littora flexu:
         Ultra quae quales populi, quae natio terras
         Incolat, (in vero nisi si quid fabula possit)
285   Nondum scire dedit reliquo mundi arbiter orbi.
         Ni frustra, per Cimmerios sylvisque propinqua
         Flumina Riphaeis, eoa profectus ad usque est
         Moenia Gincisonus, Persasque et proxima Persis
         Bactra et Bactrorum confines regibus Indos.
290   Ni frustra quaesivit iter, duraque bipenni
         Illo Forbiserus reditum sibi in aequore fecit,
         Horridum ubi semper pelagus giacieque perenni
         Frigora nativos simulant immitia montes.
         Ni frustra, quod mortali tot secla negarant,
295   Hac tuus immensum nuper Dracus ambiit orbem
         Qua patri Oceano clausas circumdare terras
         Concessit natura viam, mediaque meare
         Tellure et duplici secludere littore mundos.
             Iam si fortuna iam si virtute sequare
300   Digna tua, sunt monstra mihi, sunt vasta gigantum
         Corpora, quae magno cecidisse sub Hercule non sit
         Dedecus, Ogygius non quae aspernetur Iacchus.
         Quae si indigna putas tantaque in pace beata         
         Aversare meos multo ut tibi sanguine fines
305   Invidiosa petas, est nobis terra propinqua
         Et tantum bimari capiens discrimen in isthmo.
         Hanc tibi iam dudum primi invenere Britanni,
         Tum cum magnanimus nostra in regione Gabotus
         Proximus a magno ostendit sua vela Columbo.
310   Haec neque vicina nimium frigescit ab arcto,
         Sole nec immodico in steriles torretur arenas:
         Frigus et aestatem iusto moderamine servat,
         Sive leves auras (grati spiracula coeli)
         Seu diae telluris opes et munera curas.
315       Pone age te digno tua sceptra in honore, meoque
         Iunge salutarem propius cum littore dextram.
         Sit mihi fas aliquam per te sperare quietem,
         Vicinoque bono laetum illucescere solem:
         Quodsi consiliis superum fatisque negatum est
320   Durare immensum magna infortunia tempus,
         Quodsi de immerita iustum est cervice revelli
         Ignarum imperii dominum populique regendi,
         Quodsi nulla unquam potuit superesse potestas
         Ni pia flexilibus pareret clementia frenis
325   Obsequium. A miti quaesita potentia Cyro
         Amissa est saevae soboli. Parcendo subegit
         Tot reges Macedum virtus: tot postera sensim
         Abscidit a parto tandem inclementia regno.
         Et quod Romuleis crevit sub patribus olim
330   Imperium, diri semper minuere Nerones.”