Ugrás a tartalomhoz

Régi magyar irodalmi szöveggyűjtemény I.

Ács Pál (1954–), Jankovics József (1949–), Kőszeghy Péter (1951–)

Balassi Kiadó

FUNEBRIA MEMORIA ILLUSTRISSIMI DOMINI, DOMINI VALENTINI DRUGETH DE HOMONNA

FUNEBRIA MEMORIA ILLUSTRISSIMI DOMINI, DOMINI VALENTINI DRUGETH DE HOMONNA


      Unge, quid assiduis lacrymis; quid tristibus, Ister,
          Planctibus indulges quidque Tybisce, gemis,
      Quis te, Save, dolor; quae te, Drave, cura remordet;
          Quod fugias ripas squallidus ipse tuas?
 5   Cur Dryades late loca questibus omnia complent?
          Exululant Fauni, deserit arva Pales?
      Et contra cristas Otomannica bestia tollit,
          Laetaque lymphata gaudia mente capit?
      Quin et cornuti, capita irrequieta, Sophistae
10       In gremio risum, laetitiamque fovent.
      At proceres fletu, populusque absumitur omnis,
          Quem Patriae et fidei sanctior urit amor.
      Scilicet Heroum decus immortale, micansque
          Sustulit e terris invida Parca iubar.
15   Sustulit Hungariae columen praelustre, Valentem,
          Auricomum fldus gentis Homonnaidum.
      Qui spretum Christi semper protexit ovile.
          Qui claris struxit culta Lycea choris.
      Iura pari libra Croeso suspendit et Iro,
20       Iuvit, qua potuit, parte iuvare, pios.
      Qui fuit haud ulli patrum virtute secundus,
          Et pubi niveis usque praeivit equis.
      Qui vernis aevi, Boczkaide teste, sub annis
          Ingenium Pylii rettulit acre senis.
25   Cui quoque Boczkaides rerum legavit habenas,
          Dum bibit infando pecula tincta mero.
      Callida qui vulpes Harpyiis dictus Eois,
          Nec male, consiliis Laelius alter erat.
      Dotibus hinc animi tantis Rex motus, eidem
30       Credidit Hungarici iura sacrata fori,
      Lechus et augustos sceptri spondebat honores,
          Hungara quos illi detulit ante cohors.
      Singula quid referam verbis; cumulemve dolores?
          Omnis in hoc virtus pectore clausa fuit.
35   Hoc dixisse, sat est: fuit haec divina voluntas,
          Serius aut citius Mors sua quemque manet.
      Haec senibus iuvenes; haec sceptra ligonibus aequat,
          Non moritur, vita qui bene functus, obit.
      Nec Deus aetatem probat; at pia pectora, nec laus
40       Est vixisse diu; sed bene posse mori.